Aansoo Shayari

Yeh urri urri si rangat..

Aansoo Shayari
Yeh urri urri si rangat, yeh khillay khillay se aansu,
Teri subahh keh rahi hai, teri raat ka fasaana..
…

Kitnaa Royaa Tha Main Teri Khaatir.

Aansoo Shayari
Kitnaa Royaa Tha Main Teri Khaatir,
Ab Jo Sochu’n To, Hansi Aati Hai..!!
…

Chalo us sheher jatay hain. . !

Aansoo Shayari
Chalo us sheher jatay hain. . !
Chalo taqdeer ko phir aazmatay hain
Chalo hum rait se peero’n k ja kar naqsh chuntay hain
hawao’n per likhi sargoshi’on ko aaj sunty hain
Chalo palko’n se, neelay aur sunehray reshmi se khuwab bunty hain
hatheli per kisi ne likh diya tah lams honto’n ka
Aur aankhon k dareecho’n mein adhoora khuwab rakha tha
Sama’at an-chooi si aahato’n ki zadd mein hai shayad
Jabhi to dharkanain chup hain, jabhi to sa’atain chup hain
Chalo us sheher jatay hain
Jahan per wasl ko zanjeer se bandha nahi jata
Jahan tadbeer ko tadeer se bandha nahi jata
Ma’ni ko jahan tehreer se bandha nahi jata
Jahan dil ko kisi jageer se bandha nahi jata
jahan per chaand, taaro’n se mazayyan raat hoti hai
jahan per chahato’n ki har taraf barsaat hoti hai
Muhabbat ki jahan per jeet hoti hai
Jahan per dil k saray dushmano’n ko maat hoti hai
Chalo us sheher jatay hain. . !
…

Chaha hai tujh ko tery taghaful k bawajood. . !

Aansoo Shayari
Chaha hai tujh ko tery taghaful k bawajood. . !
Ae zindagi tu yaad karay gi kabhi humain. . !
…

Muhabbat Saneha Kar De. . . !

Aansoo Shayari
Hamaray darmian qayam hai jo
Is rabt ko kia naam do gay tum?
Zara socho!
Azal se hi zamana chahat’on k dard se na-aashna thehra
Lughat mein iski khushbu sa koi bhi lafz
Shamil hi nahi jana
Ye jab chahay milan k rung mein
Aa kar judai ghol deta hai
Ujalay ko ye jab chahay siyah kar de
Sitar’on ko fana kar de
Muhabbat Saneha Kar De. . !
…

Sun key mujh sey fasana-e-gham-e-dil!

Aansoo Shayari
Sun key mujh sey fasan-e-gham-e-dil!
Aap bhi gham zada na ho jana..
…

Na kisi ki aankh ka noor hoon..

Aansoo Shayari
Na kisi ki aankh ka noor hoon, na kisi ke dil ka qaraar hoon,
Kisi bhi kaam mein jo na aa sake mein woh musht-e-ghubaar hoon..
…

Guftugu kejiye k ye fitrat-e-insan hai. .

Aansoo Shayari
Guftugu kejiye k ye fitrat-e-insan hai ‘Shakeb’
Jaalay lag jatay hain jab band makaan hota hai. . !
…

Meri Rooh Ki Haqeeqat Mery Aansuo’n Se Pooch!

Aansoo Shayari
Meri rooh ki haqeeqat mery aansuo’n se pooch!
Mera majlisi tabassum mera tarjumaa’n nahi’n hai. .
…

Muddat K Baad. . !

Aansoo Shayari
Muddat k baad azn-e-tabassum mila magar. .
Wo bhi kuch aisa talkh k aansu nikal parray. .
…

Khud Ko Kho Raha Hoon!

Aansoo Shayari
Mein takiye per sitaray bo raha hoon. .
Janam din hai, Akela ro raha hoon. .
Kisi ne jhank kar dekha na dil mein. .
K mein ander se kaisa ho raha hoon. .
Jo dil per daagh hain pichli ruto’n kay. .
Unhein ab aansuo’n se dho raha hoon. .
Sabhi parchaai’an hain saath lekin. .
Bhari mehfil mein tanha ho raha hoon. .
Mujhy in nisbato’n se kon samjha?
Mein rishtay mein kisi ka jo raha hoon. .
Mein chonk uthta hoon aksar baithay baithay. .
K jaisay jagtay mein so raha hoon. .
Kisay paanay ki khuwahish hai k ‘Sajid’
Mein rafta rafta khud ko kho raha hoon. . !
…

Kabhi Tu Ne Bhi Socha Hai K Ye Pyaas Hai To Kyun Hai?

Aansoo Shayari
Kabhi tu ne bhi socha hai k ye pyaas hai to kyun hai?
Tujhy Paa k bhi mera dil jo udaas hai to kyun hai?
Mujhy kyun aziz tarr hai ye dhua’n dhua’n sa mosam
Ye hawa-e-shaam-e-hijraa’n mujhy raas hai tou kyun hai?
Tujhy Kho k sochta hun, Meray daman-e-talab mein
Koi Khuwab hai to kyun hai, koi aas hai tou kyun hai?
Mein ujjar k bhi hoon tera, tou bicharr k bhi hai mera
Ye yaqeen hai to kyun hai, ye qayaas hai to kyun hai?
Mery tan-bar’hana dushman isi gham mein ghul rahy hain
K mery badan pe saalam, ye libaas hai to kyun hai?
Kabhi pooch us k dil se k ye khush mizaaj shayar
Apni shayari mein jo udaas hai to kyun hai?
Tera kis ne dil bujhaya, Mery ‘Aitbaar Sajid’
Ye charagh-e-hijr ab tak, teray paas hai to kyun hai ? ?
…

Tark-e-Ta’alluq Kar Tou Chukay Hain. . !

Aansoo Shayari
Tark-e-ta’alluq kar tou chukay hain, aik imkaan abhi baaqi hai
Aik mahaaz se loot aye hain, aik maidan abhi baaqi hai
Shayad us ne hansi hansi mein, tark-e-wafa ka zikr kiya
Yunhi si ik khush-fehmi hai, itmenaan abhi baaqi hai
Raat’ain us k hijr mein ab bhi, naza’a kay aalam mein kat’ti hain
Dil mein waisi hi wehshat hai, tann mein jaan abhi baaqi hai
Bachpan k is ghar k saray kamray, maliya-mait huay hain
Jis mein hum khaila karty thy, wo daalan abhi baaqi hai
Diye mundair pe rakh aaty hain, hum har sham najanay kyun
Shayad us k laut aany ka, kuch imkaan abhi baaqi hai
Aik adalat aur hai jis mein, hum tum ik din hazir hongy
Faisla sun kar khush mat hona, aik mezaan abhi baaqi hai. . !
…

Ye Dil Zakhm Hai. !

Aansoo Shayari
Ye dil zakhm hai ik roz bhar hi jaye ga
Shagaaf pur nahi hotay faqat chataan’on k . !
…

Zabt se ehed bhaandh rakha tha..

Aansoo Shayari
Zabt se ehed bhaandh rakha tha,
Aur phir bhi bikhar gaye aansuu..
…